എല്ലാവർക്കും സ്വതന്ത്രമായി കടന്നു വരാവുന്ന ,വൃത്തിയും വെടിപ്പുമുള്ള ,അക്കാദമിക് മുന്നേറ്റം ആത്യന്തിക ലക്ഷ്യമാക്കി ബാലരാമപുരം സർക്കാർ ഹയർ സെക്കണ്ടറി സ്കൂൾ അതിജീവനത്തിൻ്റെ പാതയിലാണ്. കഴിഞ്ഞ ഡിസംബർ വരെ ഇതായിരുന്നില്ല സ്ഥിതി. പുതിയ ഹെഡ്മാസ്റ്റർ ശ്രീ. സി. ക്രിസ്തുദാസ് ചുമതലയേറ്റതോടെ ജനകീയ ഇടപെടൽ ശക്തമായി. മാർച്ച് മാസത്തിൽ ഞാനും അദ്ദേഹവും കെ എസ് ടി എ ജില്ലാ സെക്രട്ടറി ശ്രീ.നജീബും ചേർന്ന് ബഹു.ജില്ലാ പഞ്ചായത്ത് പ്രസിഡൻറ് ശ്രീ.വി.കെ മധുവിനെയും ജില്ല പഞ്ചായത്ത് ക്ഷേമകാര്യ സ്റ്റാൻ സിംഗ് കമ്മിറ്റി ചെയർപേഴ്സൺ ശ്രീമതി. എസ്.കെ.പ്രീജയെയും കണ്ടു. സ്കൂൾ വികസന കാര്യങ്ങൾ ചർച്ച ചെയ്തു . ടെൻഡർ വിളിച്ച് ഇലക്ഷൻ കഴിഞ്ഞാലുടൻ കെട്ടിടങ്ങൾ മോടിപിടിപ്പിക്കുമെന്ന് വാഗ്ദാനം നൽകി. അത് ഇപ്പോൾ യാഥാർഥ്യമാകുകയാണ്. മനോഹരമായ ക്ലാസ്മുറികൾ . ഇനി കുട്ടികളുടെ സൃഷ്ടികൾ പ്രദർശിപ്പിക്കാൻ ഡിസ്പ്ലേ ബോർഡുകൾ വേണം. പോർട്ട് ഫോളിയോ ക്യാരിയർ ബാഗുകൾ വേണം. ഇവ ആരെങ്കിലും സ്പാൺസർ ചെയ്യുമന്ന് കരുതുന്നു. ഒരു ആഗ്രഹം കൂടി.... ബഹു .എം.എൽ എ ശ്രീ.എം.വിൻസെൻറ് ആദ്യമായി ഒരു സ്കൂൾ ബസ് അനുവദിയ്ക്കുന്നത് താൻ അക്ഷരം കൂട്ടി വായിക്കാൻ പഠിച്ച ഈ സ്കൂളിലാകണമെന്ന ആഗ്രഹം. ഇപ്പോൾ ഈ വിദ്യാലയത്തെ കാക്കാൻ ആരൊക്കൊയോ ഉണ്ടെന്നൊരു തോന്നൽ ... ഇന്നത്തെ പത്രങ്ങൾ പൊതു വിദ്യാലയങ്ങൾ ക്ക് പൂട്ടു വീഴുന്ന വാർത്തകൾ എഴുതിയപ്പോൾ എനിക്ക് എഴുതാൻ തോന്നിയതാണിവ.